Գեղարքունիքի մարզ, ՀՀ

Գեղարքունիքի մարզում, ինչպես ամբողջ հանրապետությունում, Դուք կարող եք գտնել բազում պատմամշակութային օջախներ և եկեղեցիներ։ Բայց այս մարզում Դուք անպայման պետք է համտեսեք ամբողջ աշխարհում հայտնի Սևանի ձուկը՝ իշխանը։ Լճի ափամերձ հատվածում գործում են բազմաթիվ ռեստորաններ, որտեղ կարող եք փորձել ձուկը՝ խորոված, տապակած և շոգեխաշած վիճակում։ Իսկ մարզկենտրոն Գավառում իր անկրկնելի համով Ձեզ կհիացնի հայկական ավանդական քյուֆթան։

Գեղարքունիքի մարզկենտրոնն է Գավառը: Այն հիմնադրել են 1830թ. Արևմտյան Հայաստանի Բայազետ քաղաքից վերաբնակեցված հայերը` պատմական Գավառականի տեղում: Գավառը նախախորհրդային Հայաստանի չորս քաղաքներից մեկն էր: Նրա բնակչությունը գյուղատնտեսությունից բացի զբաղվում էր արհեստագործությամբ ու առևտրով:

Բարձրադիր Սևանա լիճը Հայաստանի ‹‹Մարգարիտն›› է: Այն գտնվում է Հայկական լեռնաշխարհի կենտրոնում՝ ծովի մակարդակից 1900 մ բարձրության վրա: Հայաստանի մայրաքաղաքից՝ Երևանից 63 կիլոմետր հեռավորության վրա գտնվող լիճը Կովկասի ամենամեծ լիճն է: Սևանա լիճը բոլոր կողմերից շրջապատված է լեռներով, իսկ լեռներից արդեն բացվում է լճի հիանալի համայնապատկերը: Սևանա լճի ջուրը քաղցրահամ է և մաքուր, իսկ լեռնային օդը բարերար ազդեցություն ունի առողջության վրա:

Սևանա լճի ափի երկայնքով ճանապարհը կշարունակվի դեպի Նորատուս գյուղը, որտեղ գտնվում է հայկական խաչքարերի ամենամեծ հավաքածուն։ Նորատուսը (Նորադուզը) հնագույն բնակավայր է` բրոնզի և երկաթի դարերին թվագրվող բազմաթիվ հուշարձաններով։